རིག་གནས།·
སྐད་ཡིག་སྲུང་སྐྱོབ།
ད་ལོ་སྤྱི་ལོ་2025་ནས་བཟུང་། ང་ཚོ་བོད་མི་རེ་རེ་ནས་བོད་ཀྱི་སྐད་ཡིག་འཛིན་སྐྱོང་གི་ཐད་ནུས་པ་འདོན་རྒྱུའི་གནད་འགག་གི་དུས་ཚོད་ཅིག་ལ་སླེབས་ཡོད། དེ་ལྟར་བྱ་དགོས་པའི་རྒྱུ་མཚན་ནི་འདས་པའི་སྤྱི་ལོ་2024་ལོར་བོད་ཀྱི་སློབ་ཆུང་དང་སློབ་འབྲིང་ཡོད་དོ་ཅོག་གི་ནང་དུ་རྒྱའི་སྐད་ཡིག་གཙོ་བོ་ཡིན་པའི་སློབ་གསོའི་ཐབས་ལམ་རིགས་གཉིས་པ་ཡོངས་སུ་ལག་བསྟར་བྱས་ཟིན་ཅིང་། བོད་ཀྱི་བྱིས་སློབ་ཁང་ནས་མགོ་བཙུགས་ཏེ་སློབ་ཆུང་དང་། སློབ་འབྲིང་བར་གྱི་བསླབ་གཞི་ཕལ་ཆེ་བ་རྒྱ་ཡིག་གིས་ཁྲིད་དགོས་པའི་སྲིད་ཇུས་ལག་བསྟར་བྱས་ཏེ། སློབ་གྲྭ་ཆུང་འབྲིང་གི་ནང་བོད་མིས་བོད་རང་གི་སྐད་ཡིག་ལ་སློབ་རྒྱུའི་གོ་སྐབས་མེད་པར་གྱུར། བོད་ཀྱི་མཐོ་འབྲིང་ཁག་ནས་སློབ་ཆེན་དུ་རྒྱུགས་སྤྲོད་རྒྱུའི་སྐར་འབྲས་ཀྱི་ཁོངས་སུ་བོད་ཡིག་གི་སྐར་འབྲས་རྩིས་མེད་དུ་བཏང་བ་དང་། སློབ་གྲྭ་ཆེན་མོ་ཁག་གི་ནང་དུ། དངོས་གཞིའི་མཐར་ཕྱིན་སློབ་མ་དང་། ཞིབ་འཇུག་མཐར་ཕྱིན་སློབ་མ། འབུམ་རམས་པའི་ཞིབ་འཇུག་སློབ་མ་དག་གིས་མཐར་ཕྱིན་དཔྱད་རྩོམ་བོད་ཡིག་གི་ནང་དུ་འབྲི་མི་ཆོག་པ། དགོན་པ་ཁག་གི་ནང་དུ་ཡང་རྒྱ་ཡིག་སློབ་མགོ་བཙུགས་ནས། ནང་ཆོས་ཀྱི་བསླབ་གཞི་ཁག་ཀྱང་རྒྱ་ཡིག་གི་ནང་ཁྲིད་རྒྱུའི་གྲ་སྒྲིག་བྱེད་བཞིན་པ། བོད་ཀྱི་སྐད་ཡིག་ལ་སློབ་སྦྱོང་བྱ་སའི་དགོན་པ་ཁག་གི་ནང་དུ་གྲྭ་བཙུན་ཉུང་རུ་གཏོང་བཞིན་པ་དང་། བོད་ཡིག་སྦྱངས་སའི་སྒེར་བཙུགས་སློབ་གྲྭ་ཁག་གི་སྒོ་བརྒྱབ་པ། བོད་ཀྱི་ས་ཁུལ་གྱི་ཚོང་ཁང་དང་ཟ་ཁང་སོགས་ཀྱི་སྒོ་བྱང་མཐའ་དག་རྒྱ་ཡིག་གཅིག་པོའི་ནང་འབྲི་རུ་འཇུག་བཞིན་པ་དང་། བོད་ཡིག་གིས་བྲིས་པའི་དཔེ་དེབ་དཔར་སྐྲུན་བྱ་རྒྱུར་ཆོག་མཆན་སྤྲོད་ཀྱི་མེད་པ། གཞུང་འབྲེལ་མིན་པའི་བོད་ཡིག་གི་དྲ་ཚིགས་ཕལ་ཆེ་བའི་སྒོ་བརྒྱབ་པ་དང་། མགྱོགས་འཕྲིན་དང་འཁྱུགས་དབྱངས་སོགས་ཐད་གཏོང་དྲ་རྒྱ་ཁག་གི་ནང་དུ་བོད་ཡིག་འབྲི་མི་ཐུབ་པ་བཟོས་པ་མ་ཟད། བརྒྱུད་ལམ་ཁ་ཤས་ཀྱི་ནང་དུ་བོད་སྐད་ཀྱང་བཤད་མི་ཆོག་པ་སོགས་ཀྱི་གནས་སྟངས་སུ་གྱུར་ནས། བོད་མིའི་ངོ་བོ་དང་རིག་གནས་ཀྱི་རྟེན་གཞི་ཡིན་པའི་བོད་ཀྱི་སྐད་ཡིག་ལ་རིག་གནས་གསར་བརྗེའི་དུས་སྐབས་ནང་བཞིན་དུ་ཉམས་ཆག་ཚབས་ཆེན་བྱུང་དང་འབྱུང་བཞིན་པའི་སྐབས་འདིར་བོད་མི་ཡོངས་ཀྱིས་མཐུན་སྒྲིལ་རྡོ་རྩ་གཅིག་སྒྲིལ་དང་། བོད་མི་སྒེར་བ་རེ་རེའི་ངོས་ནས་ཀྱང་ཉིན་མ་རེ་རེའི་འཚོ་བའི་ནང་གི་ལས་དོན་ཆུང་ས་ནས་མགོ་བཙུགས་ཏེ་བོད་ཀྱི་སྐད་ཡིག་སྲུང་སྐྱོབ་བྱ་རྒྱུ་ནི་ཧ་ཅང་གལ་ཆེ།
